Menu – Bilbao Mugikortasun Elektrikoa

Zenbat kutsatzen du ibilgailu elektrikoak?

% 100 elektrikoak diren ibilgailuek ez dute kutsatzen ibiltzen direnean. Hibrido entxufagarrien kasuan, kutsadura 60 gr CO2 inguru da kilometro bakoitzeko, eta autonomia luzatuko ibilgailuen kasuan, 40 gr CO2 inguru kilometro bakoitzeko. Informazio gehiago aurkitu dezakezu “Ibilgailu elektrikoaren abantailak” atalean eta “Mitoak eta egiak” atalean.

Zenbat diru balio du ibilgailu elektriko bat kargatzeak?

Ibilgailu elektriko bat kargatzearen kostua kontratatutako tarifaren arabera eta ibilgailuaren bateriaren kapazitatearen arabera aldatuko da. Oro har, kWh bakoitzaren prezioa, batez beste, 0,07 euro da gauean eta 0,15 euro egunean. Bateria osorik kargatzearen prezioa kalkulatzeko, kWh bakoitzeko prezioa eta bateriaren kapazitatea (kWh-tan neurtuta) biderkatu beharko genituzke.

Adibidez, 64 kW-eko kapazitate handiko bateria bat (500 km inguruko autonomia omen duena) haraneko orduetan osorik kargatzearen prezioa 4 euro baino gehixeago izan daiteke. Informazio gehiago aurkitu dezakezu “Ibilgailu elektrikoaren abantailak” atalean.

Zenbat denbora behar da ibilgailu elektriko bat kargatzeko?

Kontuan izanik zein kargagune mota erabiltzen dugun eta bateria zenbateraino kargatu behar dugun (% 50? % 80? % 100?), kilometro gehiagoko edo gutxiagoko autonomia izango dugu (informazio gehiago aurki dezakezu “Karga motak eta moduak” atalean).

Baina demagun 60 km egin behar ditugula egunean (Estatuan, batezbestekoa 23 km/egun da), eta ibilgailu elektrikoa etxeko entxufe bati konektatzen diogula (schuko, 1. nahiz 2. moduak), 3,2 kW-an. Kontuan izanik gaur egungo ibilgailu gehienen kontsumoa 14 kWh baino gutxiago dela 100 km egiteko, ondorioa da autoa 2 ordu eta erdi baino apur bat gehiago kargatuz gero eguneko joan-etorria egin ahalko dugula. Wallbox bat badaukagu (3. modua), are denbora gutxiago beharko dugu.

Eraginkorragoa da ibilgailu elektrikoa, ibilgailu arrunta baino?

Erabat. Ibilgailu elektrikoa eraginkorragoa da, energiaren aldetik, betiko errekuntza-ibilgailua baino. Informazio gehiago aurkitu dezakezu “Ibilgailu elektrikoaren abantailak” atalean.

Elektrizitatearen hornidurarekin arazorik egon daiteke?

Espainiako Elektrizitate Sarearen kalkuluen arabera, gaur egungo elektrizitate-eskaerarekin, sorkuntza-sistemak 6,5 milioi ibilgailu hornitu ahal ditu, instalatutako kapazitatea handiagoa behar izan gabe (une honetan 100.000 ibilgailu elektrikotik urruti gaude oraindik Estatuan). Gainera, ibilgailuen karga kudeagarria haraneko orduetan aukera ona da mugikortasunaren kostua murrizteko, elektrizitate-sistemaren eraginkortasuna gehitzeko, eta energia berriztagarriak integratzeko. Informazio gehiago aurkitu dezakezu “Mitoak eta egiak” atalean.

Ez daukat aparkaleku komunitariorik. Auto elektrikoa eduki dezaket?

Egia esan, garaje-plazarik gabe edo lotutako kargagunerik gabe, ibilgailu elektrikoa edukitzea oso zaila izan daiteke. Kargagune bat daukan udal aparkalekuetako batean plaza bat edukitzea izan daiteke konponbidea. Interesik baduzu, galdetu egiguzu.

Euria arazoa izan daiteke?

Elektrizitatearen eta uraren arteko harremanak kezka sortu ohi du pertsona askoren artean, elektrokutatzeko arriskua omen dagoelako. Baina errealitatean arrisku hori ez da ia existitzen. Fabrikatzaile guztiek, legez, bateriak babestu behar dituzte, eta korrontetik deskonektatzeko sistemak jarri behar dituzte ibilgailuetan.

Ibilgailu elektrikoak euri-tuneletan sartzen dira presio handiko txorrotekin eta 800 mm/h-ko euriteekin, zaparrada gogorren antzean. Gainera, 40 cm-rainoko ur-putzuak dituzten zonetan ibiltzen dira, autoaren beheko aldea eta bateriak urpean joanda, ondo dabiltzan ikusteko.

Kableei eta konektoreei ere hainbat proba egiten zaizkie urarekin. Horrela, guztiz lasai egon gaitezke, nahiz eta ibilgailua entxufatuta eta kargatzen egon eta euri-jasa ikaragarria egon. Informazio gehiago aurkitu dezakezu “Mitoak eta egiak” atalean.

Bilboko Hiri Mugikortasun Jasangarriaren Planaren ingurumeneko estrategiaren barruan helburu hauek lortzea sartzen da:

CO2 emisioak murriztea.
Hiriko airearen kalitatea hobetzea.
Kutsadura akustikoa murriztea.

Horretarako, errekuntza-ibilgailuak ibilgailu elektrikoekin ordeztea bultzatzeko asmo irmoa dago. Plan honetan, honako neurriak eta jarduteko proposamenak sartzen dira:

Orain dauden zerga-hobariak mantentzea trakzio mekanikoko ibilgailuen gaineko zergan.
Araututako zonetan aparkatzeko pizgarriak ezartzea.
Elektrolinerak jartzeko plan bat garatzea eta udal aparkalekuetan kargaguneak jartzea sustatzea.
Etorkizunean ibilgailu kutsagarriak murrizteko formulak aztertzea.
Udalak ibilgailu elektrikoak erostea sustatzea, autobusak barne.
Taxietan eragitea, 2020tik aurrerako ibilgailu berri guztiak 0 emisiokoak izan daitezen, eta 2030erako taxi guzti-guztiek ezaugarri horiek izan ditzaten.

Laguntzak

Hona hemen eskatu ahal dituzun dirulaguntzak:

Bilboko Udalarenak:

Zirkulazio-zergan % 95eko salbuespena.

EAE eta estatu mailakoak:

Moves III 2021-2023 Plana:
Moves III plan berrienak 7.000 €arteko laguntzak eskaintzen ditu ibilgailu % 100 elektriko berri batentzat, gutxienez 7 urteko errekuntza-ibilgailu bat txatar bihurtu dela frogatzen bada. % 100 elektrikoak diren ibilgailuentzako laguntza ez txatar bihurtzea 4.500 €-koa da. Bi kasuetan, laguntza 45.000 €-ko mugaren mende dago auto berriaren prezioan, BEZik gabe (53.000 €8 edo 9 plazako ibilgailuen kasuan).
Planak partikularrentzako karga-puntuak instalatzeko laguntza ere jasotzen du, diruz lagun daitekeen kostuaren % 70ekoa.
Esteka: https://www.eve.eus/Programa-de-ayudas/2020/Programa-MOVES-III-2021-2023?lang=eu-es
2021eko Ibilgailuen PAVEA (RENOVE Euskadi) Plana:
Eusko renove planak 10 urte edo gehiago dituen ibilgailu bat atxatarratzea ezinbestekoa du ere, eta kasu honetan laguntzaren kopurua 3.000€-etaraino heldu daiteke %100 elektrikoak diren ibilgailuentzako.
Eskaera berriak onartzeko aukera gutxi dago, diru laguntzaren presupuestoa erabat erabili bait da.
Nolanahi ere, euskal berritzeak 10 urte edo gehiagoko auto bat txatar bihurtzea eskatzen du, eta kasu honetan laguntzaren zenbatekoa 3.000 €da ibilgailu % 100 elektrikoentzat. Plan hau ez da bateragarria MOVES III planarekin.
Esteka: https://www.eve.eus/Programa-de-ayudas/2020/Plan-Renove-de-Vehiculos-2021-(PAVEA)?lang=eu-es

Mugikortasun elektrikoa sustatzeko udal ekitaldiak

Duela zenbait urtetik hona, Mugikortasuna eta Jasangarritasuna arloak hainbat ekintza, neurri eta ekitaldi garatu ditu mugikortasun elektrikoa eta ibilgailu elektrikorako trantsizioa errazteko. Udal-arlo guztien artean ibilgailu elektrikoaren barne-sustapen etengabeaz gain, eta udal-aparkalekuetan barne-erabilerako karga-puntuak instalatzeaz gain, kronograma honetan arlotik egindako lanaren ekintza adierazgarrienetako asko jasotzen dira:

2016 – Lehen elektrolinera IBIL instalazioa
2017 – Ibilgailu elektrikoak EEErekin batera lagatzeko kanpaina
2017 – 1. diru-laguntza taxi elektrikoak erosteko 110.000 €(10.000 €/ taxi)
2018 – 2. diru-laguntza taxi elektrikoak erosteko 110.000 €(10.000 €/ taxi)
2018 – Lau elektrolindegi berri instalatzea (bi IBILekin eta bi Iberdrolarekin)
2019 – Pedalei eragiteko bizikleta elektrikoaren zerbitzu publiko berria, Bilbaobizi lagundua
2019 – Iberdrolaren hiru elektrolindegi berri instalatzea
2019 – 3. diru-laguntza taxi elektrikoak erosteko 110.000 €(10.000 €/ taxi)
2019 – Ibilgailu elektrikoa kargatzean aparkatzeko diru-laguntza
2019 – I ECO RALLYE Bilbao Petronor
2019 – Mugikortasun elektrikoko tailerrak kontzesionario eta operadore logistikoekin, EEErekin lankidetzan
2020 – Mugikortasun elektrikoari buruzko POLIS kongresu europarra
2020 – Mugikortasun elektrikoari buruzko udal web orria
2020 – Liburuxka inprimatzea ibilgailu elektrikoaren abantailekin
2020 – 1. diru-laguntza furgoneta elektrikoak erosteko 70.000 €(7.000 €/ furgoneta)
2021 – 2. diru-laguntza taxi elektrikoak erosteko 100.000 €(5.000 €/ furgoneta)
2021 – II ECO RALLYE Bilbao Petronor

Gaur egun, ibilgailu elektriko bat erostea zuzenean lotuta dago etxeko KARGAGUNE bat edukitzearekin (lotutako kargagunea deritzona), gauez bateria kargatu ahal izateko eta eguna ahalik eta autonomiarik handienarekin hasteko.

Batzuek karga-ekipoa euren kabuz erosi eta geroago instalazioa eta legalizazioa kontrolatzea erabakitzen dute, baina pertsona gehienentzat gomendagarriena da instalatzaile elektrikari baimendun bati edo karga-zerbitzuen hornitzaile bati eskatzea kargagunea eta instalazioa.

Karga-zerbitzuen hornitzaile bat elektrizitate-konpainia bat izan daiteke, esate baterako, eta erantzun integrala eskaini ahal dizu: kargagunearen erosketa, instalazioa, legeztapena eta bermea, eta elektrizitatearen faktura bera. “Arazoa” konpontzeko modu erraz samarra da. Instalatzaile elektrikari batek lotutako kargagunea erosten eta instalatzen lagundu ahal dizu, argia kontratatzen diozun elektrizitate-konpainia zein den gorabehera. Gomendagarriena da galdetzea eta aukera biak erkatzea.

Edozein kasutan ere, ondo legoke gauza pare bat jakitea kargagune bat jartzeari buruz:

Instalazioaren obra eta elektrizitate-sarera konektatzeko obra egiteko, zein den instalazio-eskemarik egokiena (aurrerago, atal honetan, dauden instalazio-eskemak deskribatuko ditugu). Instalatzaileak edo hornitzaileak zure kasuan eskema egokiena zein den jakinarazi behar dizu.
Kargagunearen legeztapena. Prozesu hau instalatzailearen erantzukizuna da (zure kezka bakarra izan behar da egin dezatela ziurtatzea). Besteak beste, diseinuaren memoria teknikoa prestatu behar dute (erabiliko den konexioaren eskemarekin) eta CIE dokumentu ofiziala (elektrizitate-instalazioen ziurtagiria) eman, ziurtatzeko instalazioa ITC-BT-52 tentsio txikiko araudi elektroteknikoaren arauen arabera egin dela. Ziurtagiri horrek Industria Sailaren zigilua eduki behar du; beraz, instalatzaileak Industria Sailean aurkeztu beharko du.

Eta zenbat balio du?

Lotutako kargagune bat garaje komunitario batean instalatzen badugu (kasurik ohikoena izan daitekeena), prezioa garajearen tamainaren arabera eta aparkatze-plazatik elektrizitate-instalaziora dagoen distantziaren arabera aldatuko da. Baina, kasurik gehienetan, aurrekontua 1.500 eta 2.000 euro artekoa izan daiteke. Hori kasurik gehienetan erreferentzia izan daiteke, barnean hartuta kargatze-ekipoaren (wallboxaren), elektrizitate-koadroaren eta kableen erosketa, instalatzailearen zerbitzuak, eta BEZa.

INSTALAZIO-ESKEMARIK egokienaren kasuan, ordea, garaje komunitarioa daukan pertsona baten ikuspegitik, hainbat aukera daude:

Geure kontagailua erabiltzea

Norberaren elektrizitate-instalaziotik deribazio bat egingo genuke, etxebizitzaren elektrizitatea hornitzeko kontratua aprobetxatuz. Deribazio hori kontagailutik egin daiteke (normalean zero solairuan, instalazioa errazteko, kable metro gutxiago erabiltzeagatik), edo etxebizitzako koadro orokorretik, kable metro gehiagorekin eta instalazio garestiagoarekin, baina kargagunea elikatzen duen zirkuitu-linea zuzenean kontrolatuz.

Garajeko kontagailua erabiltzea

Plaza ez badago bizi garen eraikin berean (edo arrazoi teknikoengatik edo araudiarengatik ezin badugu geure kontagailutik deribazioa egin), deribazioa garajeko elektrizitatearen kontagailutik egin daiteke. Kasu hauetan kontagailu sekundario bat beharko da deribazioan, garajeko jabe-erkidegoak kargagunean kontsumitutako elektrizitatea kobratu ahal izateko.

Hornidura berria erabiltzea

Kasu honetan, ez litzateke deribaziorik egingo aurretik zeuden kontagailuetatik; horren ordez, elektrizitate-hornidura berri bat kontratatuko litzateke, bere kontagailu nagusiarekin (halere, aldian behingo kostu finko batzuk izango lituzke). Aukera hau egokia da baldin eta kargagune bat baino gehiagorako bada eta/edo garaje oso handietarako bada. “ Enborreko instalazioa ” edo aurreinstalazioa ere esaten zaio. Instalazio berriaren kontagailu nagusitik, kontagailu sekundarioak deribatuko lirateke kargagune bakoitzerako.

Edozein aukerarekin ere, garaje komunitario batean kargagune bat jarri ahal izateko, beharrezkoa da (eta nahikoa da) komunitateko presidenteari edo finken administratzaileari idatziz jakinaraztea. Enborreko instalazioa egin ez den garajeetan, komunitate guztiak argi baldin badauka kargagune berri horrek ez duela guztien elektrizitatea kontsumitzen, gaizki ulertuak eta susmo txarrak galaraziko dira.

Azkenik, lotutako kargagune bat jartzea pentsatzen ari bazara, hona hemen datu interesgarri batzuk:

Kontratatutako gutxieneko potentzia

Zure elektrizitate-fakturaren kostu finkoa da. Aldi berean kontsumitu ditzakezun kilowatt (kW) kopurua da (finean, zenbat etxetresna elektriko piztu ditzakezun aldi berean). Kargagune normal batek 3,7 kW kontsumitu ditzake, eta garbigailu edo labe arrunt batek 2 kW baino gutxixeago. Beraz, kasurik gehienetan, kargagunea instalatzeko ez da beharrezkoa izaten kontratatutako potentzia gehitzea, batik bat kargaguneak gauez kontsumitzen duelako energia. Hala eta guztiz ere, kontuan izatea komeni da.

Tarifa motak

Tarifa batzuetan ordutegia kontuan izaten da: kWh bakoitzeko prezioa merkeagoa da ordu jakin batzuetan eginez gero, baldin eta eguneko gainerako orduetan gehiago ordaintzen bada. Berez, ez da bakarrik gaueko tarifa: egunean 14 ordu merkeago eskaini ohi dituzte. Ibilgailu elektriko bat badaukazu, abantaila handia izan daiteke zure elektrizitate-konpainiaren haraneko tarifa edo super-haraneko tarifa kontratatzea.

Tarifa horiez gain bada tarifa berezi bat ibilgailu elektrikoak dituzten gidarientzat. Tarifa honek hiru denboraldi ditu, eta ez bi: ordutegi berri bat sartzen du, gaua haraneko orduen eta super-haraneko orduen artean banatuz. Ordu horiek goizaldeko ordu batetik goizeko zazpiak arte dira. Aukera bikaina da ibilgailu elektrikoen gidarientzat, autoa gauez kargatu ahal dutelako, ahalik eta merkeen. Tarifa horiek enpresa askotan kontratatu ahal dira, bezeroaren arreta-zerbitzuaren bidez.

Kargagailu motak

Hainbat kargagailu mota daude merkatuan lotutako karga motelaren 3. moduan. Wallbox izena jasotzen dute (hormako karga-basea). Batzuek mahukan daukate konektorea. Beste batzuek, berriz, kargaren hartunea edo entxufea baino ez dute; horrelakoetan, mahuka edo kablea ibilgailuan gorde behar duzu. Gogoan izan behar dugu ibilgailu elektriko guztiek ez daukatela karga-konektore berdina (ikusi “Karga-konektoreen motak”). Gaur egungo wallbox batzuek kargako erregulazio automatikoko sistema bat daukate, karga ahalik eta potentziarik handienarekin egin ahal izateko, betiere kontratatutako mugaren azpitik.

Autonomia gutxi dute

Lehenengo auto elektrikoekin hala gertatzen zen arren, hau aspaldi aldatu zen. Teknologiak azken urteetan izan duen eboluzioarekin, dagoeneko 250-350 km arteko autonomia errealak izan ditzakegu (gama altukoek 500 km baino gehiagoko autonomia izan dezakete). Egia da autonomia maila hori kanpoko faktoreek baldintzatu ahal dutela (klima hotza edo beroa, eta antzekoak), baina modu berean egia da baterien sektorea oso azkar egiten ari dela aurrera.

Ezin da bidaia luzerik egin.

Esaten dute ezin omen dela bidaia luzerik egin auto elektrikoarekin, baina errealitatea oso bestelakoa da. Ibilgailu elektrikoen autonomia gero eta handiagoa da gaur egun, eta kargaguneen sarea, modu berean, gero eta hedatuago dago, bai Estatuan, bai nazioartean. Marka batzuek adierazten dute Europan kargagune bat aurki daitekeela 120 km bakoitzeko. Gasolinazko ibilgailuen aldean, ibilgailu elektriko batekin bidaia luze bat egin ahal izateko, beharbada ibilbideak hobeto planeatu beharko dira, lasaitasunez bidaiatu ahal izateko.

Elektrizitatearen zalantzazko jatorria

Gaur egun ukaezina da ibilgailu elektrikoek kontsumitzen duten elektrizitateak emisioak dituela. Elektrizitatearen sorkuntza energia berriztagarriaren proportzioaren mende dagoenez gero (elektrizitate-mixa), ez da okerra esatea ibilgailu elektriko batek emisioak zeharka sortzen dituela, baina ez bere erabileran. Ordea, kontuan hartzen badugu gaur egun Estatuan sortzen den energia elektrikoaren % 62 inguruk ez daukala karbono-emisiorik (energia eolikoa, fotovoltaikoa, hidraulikoa, nuklearra, …) eta hortik ondorioztatzen badugu 1 kWh sortzeko 321 gramo CO2 ateratzen direla (datu ofizialen arabera), esan dezakegu, are zeharkako emisio hauek kontuan izanik ere, ibilgailu elektrikoaren energia-kontsumoa eta CO2-emisioak gasolinazko autoaren laurdena baino ez direla, gutxi gorabehera. Ez dezagun ahaztu, gainera, energia berriztagarrien proportzioa gero eta handiagoa dela elektrizitate-mixean; beraz, zeharkako emisioak gero eta txikiagoak izango dira.

Emisioak, gutxi gorabehera
100 km, gasolinazkoa	15,43 kg de CO2
100 km, elektrikoa	4,59 kg de CO2* * zeharkakoa elektrizitate-mixean

Baterien fabrikazioak gehiago kutsatzen du gasolinazko auto batek bere bizialdi osoan kutsatzen duena baino.

Batzuek esaten omen dute ibilgailu elektriko baten bateria fabrikatzeko CO2-emisio gehiago sortzen direla, gasolinazko modelo batek bere bizialdian egingo dituen kilometro guztietan sortuko dituena baino.

Gaiaz egin diren ikerketa urrietako baten kalkuluek adierazten dute bateria fabrikatzeko 50 kg CO2 inguru sortzen direla kWh bakoitzeko. Horrek esan nahi du 64 kWh-ko bateria daukan ibilgailu elektriko batek 3.200 kg CO2 igorriko dituela bere bateria fabrikatzean eta, 200.000 kilometroko bizialdian, beste 9.180 kg CO2, zeharka, erabilitako elektrizitatearen ondorioz. Batura 12.380 kg CO2 da, hau da, gasolinazko ibilgailu baliokide batek bere bizialdian emititu ahal duen CO2tik urrun (30.860 kg). Hau da, baterien fabrikazioa eta kontsumitutako elektrizitatearen sorkuntza kontuan izan arren, ibilgailu elektriko baten zeharkako emisioak gasolinazko ibilgailu baten zuzeneko emisioen heren bat baino pixka bat gehiago baino ez dira. Proportzio hau are txikiagoa izango litzateke errekuntza-ibilgailu baten zeharkako emisioak ere kontuan izango bagenituzke: petrolioa ateratzea, birfintzea, garraiatzea, olioaren inpaktua, iragazkiak, … Nolanahi ere, ez daukate partikulen emisio kutsagarririk ez nitrogeno oxidorik (zuzenean ez zeharka), eta horiek dira hiri handien arazo nagusia gaur egun.

Bateriaren bizialdia laburra da

Hau izan ohi da ibilgailu elektrikoen borroketako bat gaur egunera arte. Ibilgailu elektrikoaren bizialdian bateria berria jarri beharko balitzaioke, proportzioan garestia izan liteke (marka batzuen iritzian, bateriaren kostua autoaren kostu osoaren % 30 edo % 40 da). Horregatik, marka batzuek 7 urtera arteko bermeak eskaintzen dituzte, edo beste formula batzuk, hala nola baterien alokairua, benetan interesgarri suertatu daitezkeenak. Hala eta guztiz ere, ikusten ari gara bateria berrien bizialdia ibilgailuaren bizialdia bezain luzea dela. Beraz, bateria ordeztearen kostuaren arazoa desagertzen ari da.

Elektrizitate-sareen kolapsoa

Uste hau ere oso hedatuta dago baina, zorionez, nazioartean gezurtatu da: ibilgailu gehienak elektrikoak direnean energia elektriko nahikoa egongo ote den. Zenbait herrialdetako energia-hornitzaileen elkarteek adierazi dute ondo prestatuta daudela eskaera honi aurre egiteko (zenbait milioi ibilgailu elektriko), etorkizuneko ikuspegi horiekin.

Aseguruak garestiagoak dira

Duela urte batzuk bai. Baina ibilgailu elektrikoak ugaritu direnez, aseguruen prezioa apurka-apurka murriztu da. Eta gaur egun auto elektrikoen aseguruak, sarritan, diesel edo gasolina auto baten berdintsuak dira.

Ez dira hain azkarrak, potenteak, ezta seguruak ere

Batzuek uste dute ibilgailu elektriko batek ezin duela eduki abiadura handi bat edo ez daukala potentziarik; bada, erantzun behar zaie ibilgailu elektriko batek errekuntza-autoen abiadura berbera izan dezaketela (baimendutako 120 km/h baino gehiago). Are gehiago, modelo baliokideetan azelerazio handiagoa dute eta haien par motorra (gurpiletako indarra) berehalakoa da, eta ez mailakatua, gasolinazko edo dieselezko modeloen moduan. Segurtasuna, berriz, baldintza guztietan bermatuta dago: ibiltzen, kargatzen, euriteetan, basamortuko bero-galdatan edo zero azpiko tenperaturetan, elektrizitate-deskargetatik babesturik. Alemaniako ADAC-en proben arabera, sute-arrisku txikiagoa dago ibilgailu elektriko batean, errekuntza-motorra duen batean baino.

Isurketak murriztea eta jasangarritasuna

Hori du alde onen artean nagusia eta lehenengo aipatu beharrekoa. Ibilgailu % 100 elektrikoak biziki laguntzen du eguratsera isurtzen diren gai kutsagarriak gutxiagotzen eta tokian tokiko airearen kalitatea hobetzen. Bakoitzak erabakia hartzen badu erregai fosil kutsagarriak ez kontsumitzeko, lagundu egiten du mundu jasangarriago eta eraginkorrago bat sortzeko prozesuan, ezin ukatuzkoa da. Zero isurpeneko ibilgailuak dira. Zirkulazioan, ez dute isurtzen ez karbono dioxidorik, ez karbono monoxidorik, ez nitrogeno oxidorik, eta laino toxikorik ere ez dute sortzen.

Jabetzan edukitzeko kostua, orotara, txikiagoa du

Nahiz eta oraindik ere garestiagoa den ibilgailu elektriko bat erostea (oso denbora gutxi barru ez da horrela izango), gaurko egunean, dagoeneko, errentagarriago atera daiteke epe ertain/luzean. Arrazoi nagusia da aurreztu egiten dela, zeren eta ibilgailu elektrikoa betetzea merkeago ateratzen baita deposituak gasolinaz edo dieselez betetzea baino, hemen eskuineko taula honetako gutxi gorabeherako datuetan ageri den moduan.

Kontuan hartzekoa da, gainera, aurreztu egiten dela mantentze-lanetan, IAT-etan konponketetan, matrikulazioetan eta zergetan, eta bistan da zergatik. Ezin konta ahala web-orri daude kalkulatzen eta alderatzen dutenak zenbat ateratzen den guztira eta luzera erregailu fosilak erretzen dituen ibilgailu bat eta zenbat ibilgailu elektriko bat (taula horietan, urteko km-ak kalkulatu ahal dira, eta zenbat urte iraun dezaketen ere bai, eta ibilgailua kargatzeko puntu bat instalatzeak duen kostua ere bai). Alderatze horiek ematen dituzten emaitzak oso argigarriak izan ohi dira.

GUTXI GORABEHERAKO KOSTUAK
100 Km gasolioa	8€
100 Km diesela	6€
100 Km elektrikoa	1,4€

Kutsadura akustikoa murriztea

EBk erabaki du 2021ean nahitaezko izan dadila ibilgailu elektrikoetan ohartarazle elektrikoak jartzea; izan ere, ibilgailu elektrikoak, dabilenean, ia ez du zaratarik eragiten (burrunba bat bakarrik azeleratzen duenean eta gurpilak asfalto gainean bira egitean eragiten duena), eta, hala, gutxitu egiten dira hirietan eragiten den kutsadura akustikoa eta osasunari eragiten dion kaltea. Gidari gehienek diote ibilgailu elektrikoa gidatzea lasaigarria izaten dela oso.

Erraz gidatzekoa

Ibilgailu elektrikoak automatikoak dira (enbragerik gabeak), eta askoz ere errazagoa da haiek gidatzea. Finean, gidatzea ez da hain estresagarria izaten ibilgailu elektrikoetan, eta hiri barruan gidatzea ere ez da hain nekagarria izaten.

Pribilegioak hiri inguruneetan

Bilbon, zehazki, ez da oraindik ezarri horrelako neurririk (baina lehentxoago edo gerotxoago ezarriko dira); hala ere, geroz eta gehiago dira ibilgailu elektrikoentzako pribilegioak eskaintzen dituzten hiriak. Dela hiriguneetara sartu ahal izatea bera (aldiz, eragotzi egiten zaie erregai fosilak erretzen dituzten ibilgailuei edo EKO ez diren ibilgailuei), dela kalean dohainik aparkatzea, edo errail bereziak ezartzea haientzat eta abar.

Ahaztu gasolindegiak

ibilgailua etxean kargatzea gauez garajean dagoen artean, eta goizean bateria % 100 beteta dagoela irtetea, depositua bete beharraz ahaztuta (baldin eta distantziek aukera ematen badute, eta aukera hori egunik gehienetan eta pertsonarik gehienentzako egiazkoa izango da), sentsazio berri eta atsegingarria da lehen erregai fosilezko ibilgailua erabiltzen zuenarentzat.

Eraginkorragoak dira

Erregai fosilak erretzen dituen motor baten errendimendua % 20koa da. Hau da, erretzen duen energiaren bosten bat bakarrik aprobetxatu ahal du. Motor elektriko batek % 75eko errendimendua eskaintzen du, hau da, erretzen duen energiaren hiru laurden aprobetxatzen ditu. Jasangarritasunaren eta eraginkortasun energetikoaren ikuspuntutik, aldea itzela da.

Probatzen duenak berriro nahi izaten du

Berez ez da abantaila bat, baina datu honek erakusten du abantaila asko dituela, zeren eta ibilgailu elektriko bat gidatu izan duten pertsonen artean % 99k esan ohi du ez lukeela berriro erosiko erregai fosilezko ibigailu bat (Ibilgailu Elektrikoen Erabiltzaileei buruzko lehen inkestaren arabera).