EUROPAK IRLANDAREN AZALERA BALIOKIDEA ERABILIKO DU DIESELA ETA GASOLINA BAINO GEHIAGO KUTSATZEN DUTEN BIOERREGAIAK EKOIZTEKO

Heidelbergeko Energia eta Ingurumen Ikerketako Institutuaren txosten batek lehen aldiz kuantifikatu du ‘bio’ erregaien ekoizpena bultzatzen duten Europako politikek lurzoruaren erabileran duten eragina.

Europa lur kopuru ikaragarria erabiltzen ari da bioerregaiak ekoizteko. Gutxienez 9,6 milioi hektarea hartzen dituzte mota horretako erregaiak sortzeko makrolandaketek, eta, bio etiketa gorabehera, ingurumen-inpaktu handia dute, Energia eta Ingurumen Ikerketako Institutuak Transport&Environment-en enkargupean otsailean argitaratutako ikerketa baten arabera. Lur horien neurriak, laburbilduz, Irlanda uhartearen eremu geografikoarenak (8,4 milioi hektarea) baino handiagoak dira.

Europak, 2009an, Berriztagarrien Zuzentaraua onartu ondoren, bioerregaiak sustatzearen aldeko apustua egin zuen, dieselaren eta gasolinaren alternatiba gisa. Konposatu kimiko honek nekazaritzako lehengaiak behar ditu, gehienak soja, koltza, arto, ekilore edo palma sail zabaletatik ateratakoak, besteak beste. Horrelako substantziak sustatzean, EBk ez zuen kontuan hartu lurraren erabileran izango zuen eragina, bai kontinentean, bai kanpoan, ekoizpenaren zati handi bat kanpo geratu baitzen hego globaleko herrialdeetan.

Era berean, ez zuen informazio gehiegi bildu erregai ekologiko horien berotegi-efektuko isuriei buruz. Geroago, 2016an, argitara atera zen zerbait. Europako Batzordeak ikerketa bat argitaratu zuen, egiaztatzen zuena ezen, zeharkako emisioak gehituz – lehengaiak landatzeko eta ekoizteko prozesuan sortutakoak –, bioerregaiek CO2 emisio handiagoak zenbatzen zituztela diesel eta gasolina konbentzionalek baino.

Orain, argitalpen berri honek lehen aldiz kuantifikatzen du Europako trantsizio-politika horiek eragindako lurren hedadura. Emandako datuek erakusten dute kontinente zaharrak isuri gehiago aurreztu zitzakeela diru hori ibilgailu elektrikoak kargatzeko energia berriztagarrietara bideratu izan balu. Izan ere, ibilgailu bat eguzki-energiaz elikatzeko, errekuntza-auto baten motorra elikatzen duten bioerregaiak landatzeko erabiltzen dena baino 40 aldiz lur gutxiago beharko litzateke.

“Oraintxe bertan, lur eremu zabalak hipotekatzen ditugu gure ibilgailuetan erretzen ditugun landareetan. Diru xahutze eskandalagarria da. Azalera horrek milioika pertsona elikatzeko balio lezake “, dio Carlos Rico Transport&Environment-eko bozeramaileak. “Bioerregaiak esperimentu huts bat dira Energia Berriztagarrien Zuzentarauaren barruan. Munduko elikagaien krisiari aurre egiten diogun bitartean elikagaiak erregai gisa erretzen jarraitzea astakeria da “, adierazi du Lucia Rua ECODESeko bozeramaileak.